Ný ríkisstjórn fyrir karlinn

Karlinn minn er 60 ára í dag og hann biður bara um tvennt í afmælisgjöf

• Nýja ríkisstjórn
• Neyðarhjálp til Palestínu

Ég ætla að gefa honum hvoru tveggja því hann á allt gott skilið. Ætla að leggja inn á neyðarsöfnunarreikning Félagsins Ísland Palestína og síðan vinn ég að því hörðum höndum að koma ríkisstjórninni frá. Vil fá ríkisstjórn sem leggur áherslu á velferð, frið og réttlæti til handa fólki og umhverfi.

Neyðarsöfnunin hefur reikning 0542-26-6990 og kennitölu 520188-1349

 

13 mánuðir frá síðasta fundi fjölskyldunefndar

Sendi Birna Inga Hrafnssyni eftirfarandi bréf núna áðan.

Björn Ingi Hrafnsson,formaður fjölskyldunefndar ríkisstjórnarinnar  

Ósk um fund í fjölskyldunefnd  

Ágæti formaður. Með þessu bréfi vil ég óska eftir fundi í fjölskyldunefnd ríkisstjórnarinnar – og ekki seinna en vænna því aðeins fimm dagar eru þar til henni verður skipt út. Mér reiknast til að nú séu 13 mánuðir frá því að fjölskyldunefnd ríkisstjórnarinnar hélt fund síðast eða 6. apríl 2006. Er það undarlegt eftir allar hinar stóryrtu yfirlýsingar um tímamótavinnu hennar.

Við í Samfylkingunni héldum þó áfram að sinna þessum brýnu málaflokkum. Á síðustu mánuðum hafa á vettvangi flokksins verið útfærðar hugmyndir sem hafa það markmið að bæta hag barnafjölskyldna og kynntar hafa verið í 60 atriða aðgerðaráætlun undir yfirskriftinni – Unga Ísland. Undirrituð sem er fulltrúi Sambands íslenskra sveitarfélaga í fjölskyldunefndinni hef mikinn hug á að deila þessum hugmyndum með öðrum nefndarmönnum, kanna hug þeirra til hugmyndanna og afla stuðnings við að koma þeim til framkvæmda.  Gott væri að þessi fundur gæti orðið við fyrsta tækifæri. 

Kær kveðja, Björk Vilhelmsdóttir  

P.s. Það vekur það athygli mína að búið er að loka vefsvæði fjölskyldunefndarinnar á www.fjolskylda.is og hvergi á vefnum er að finna fundargerðir né annað efni sem nefndir hefur tekið saman.  

Hjálögð er stefna Samfylkingarinnar í málefnum barna og unglinga – Unga Ísland. 

 

Skrár tengdar þessari bloggfærslu:

• Unga Ísland - styttri útgáfa

Rósaganga án þyrna

Ég hef aldrei tekið þátt í jafn skemmtilegri kosningabaráttu og nú. Ef mín tilfinning segir eitthvað til um væntanleg úrslit þá er Samfylkingin með svona 60+ (ég er ekki að tala um Ellert Schram og félaga) heldur hlutfall okkar af fylginu.

Ég hef undanfarið gengið frá einni dyr í aðra (ekki hús úr húsi) þar sem ég hef verið þar sem láglaunafólkið býr og fólkið sem þarf að reiða sig á lífeyri almannatrygginga. Þeir sem finna hversu erfitt það er að lifa á litlu þegar ríkissjóður hefur tekið hluta sinn í tekjuskatt vilja skipta um ríkisstjórn, þeir vilja hjálpa okkur að koma á auknum jöfnuði þar sem skattabyrði þeirra sem lifa á loftinu verði afnumin.

Á sama tíma og fólk vill breytingar á Alþingi, í stjórnarráðinu með jöfnunar- og velferðaráhrifum þá er það líka að tala um frábærar sjónvarpsauglýsingar Samfylkingarinnar; Karíus og Baktus, biðlistar, íslensk tradisjón og fleira er í boði. Ég hef enn ekkert séð, enda vel ég umfram allt annað þessa daga, að fá mér rósagöngu - því hún er algerlega án þyrna. 

Áfram nú – upp um 2% á dag !!!

 

Heit helgi

Já það má með sanni segja að helgin hafi verið heit, í þeirri merkingu að veðrið var afskaplega gott á Blönduósi. Ekki veit ég hvað hversu margar gráður voru, nú er engin Grímur Gíslason til að segja okkur það. Fólk sá milli 16 - 23°C á sínum mælum og fór það eftir því hversu stoltir heimamenn þeir voru. A.m.k. naut ég veðurblíðunnar eins og aðrir.

Samfylkingin í Norðvestur-kjördæmi 

Á föstudagskvöld opnaði Samfylkingin kosningaskrifstofu í Fróða (heitir núna Ósbær) og þar komu um 40 manns til fjölskylduskemmtunnar þar sem boðið var upp á húnverskt lambakjöt beint af grillinu.  Guðbjartur Hannesson oddviti Samfylkingarinnar í Norðvesturkjördæmi hélt frábæra hvatningarræðu auk þess sem hann fór vel yfir málefnastöðuna. Nú munar litlu að við náum inn Önnu Kristínu okkar 3ja manni og verður unnið markvisst að því. Við Árný gerðum okkar besta á laugardagseftirmiðdegi þegar  við stóðum fyrir framan Kaupfélagið (nú Samkaup) og dreifum bæklingum og ræddum við fólk sem kom í hrönnum til að kaupa kol á grillin.

Ferming 

Í  dag var síðan ferming Elínar Huldur Harðardóttur. Hún er yndisleg og sjálfstæð stúlka og mikið var gott að fá að fylgja henni upp að altarinu og vera síðan með fjölskyldu og vinum í fallegri veislu sem haldin var á hótelinu. Þar kom sjálfstæði Elínar Huldu vel í ljós þar sem valdi ekki hefðbundið stelpuskraut, heldur var blátt þema og bauð hún gestum að skoða sitt uppáhaldsdót s.s. svæfilinn sinn, dúkkur og verðlaunapeninga fyrir hestamennsku. Það er ég viss um að Elín Hulda mun dúxa í lífinu - á sinn hátt.  

Baráttan framundan 

Á laugardag var ég í 8 tíma heimaprófi í stjórnsýslurétti sem ég tók í gamla grunnskólanum. Ég held að það hafi gengið mjög vel, a.m.k. mun betur en mér gekk í síðustu prófunum sem ég tók þar fyrir tæplega þrjátíu árum.  Nú er ég laus og liðug, og get því verið enn harðari í baráttunni fyrir nýrri ríkisstjórn - ríkisstjórn velferðar og friðar.

X-S þann 12. maí. Við ætlum okkur aukin jöfnuð, því þarf að kjósa Samfylkinguna.  

Háhraðatenginu í Norðvesturkjördæmi.

Komin norður á Blönduós til að læra, en læt freistast og fer á netið. En þá kemur babb í bátinn. Er hér hjá Kristínu vinkonu sem er með fínn ADSL greini en það dugar ekki þar sem netsambandið er ótrúlega lélegt. Búin að tapa 2 færslum, þeirri fyrri um þetta ástand sem gerir það að verkum að ég skil 100% ósk fulltrúa Samfylkingarinnar í Norðvesturkjördæmi að fá háhraðatengingar um allt land.

Bloggaði líka áðan undir fyrirsögninni "Afsögn ráðherra, já takk" en það tapaðist. Prófa nú að vista þetta áður en frekari skrif fara í súginn.

Jesús líklega vonsvikin

Jesús sýndi það svo sannarlega þegar hann var hér meðal mannanna að hann elskaði fólk eins og það var, og ekki dró hann fólk í dilka eftir stöðu þess í samfélaginu. Jesús sýndi þeim sem stóðu höllum fæti gangvart valdhöfum sérstakan áhuga og vildi bæta stöðu þeirra í samfélagi manna.

Nú skil ég ekki þjóðkirkjuna sem boðar orð Jesú krists.  Ég ætla samt ekki að segja mig úr þjóðkirkjunni því innan hennar starfar fólk sem er ötult baráttufólk fyrir réttindum samkynhneigðra þ.á.m. fyrir rétti til hjónavígslu í Guðshúsum. Ég vil starfa með þessu fólki, þau eiga það skilið að við skoðanasystkin þeirra stöndum nú með þeim.

En ég þarf að spyrja einhvern sem til þekkir, afhverju greiddu bara 22 með tillögunni þegar hún var borin upp af 41 presti og guðfræðingi.

Tillaga um hjónavígslu samkynhneigðra felld

Gaman SAMAN

SAMAN-hópurinn á svo sannarlega skilið að fá lýðheilsuverðlaunin í ár. SAMAN-hópurinn vinnur að velferð barna, en hefur með starfi sínu hugað að velferð fjölskyldna. Áróður SAMAN-hópsins fyrir því að börn og foreldrar njóti meiri tíma saman og að foreldrar elski óhikað hefur virkilega stutt mig í foreldrahlutverkinu. Velsæld mín hefur aukist því mín reynsla er sú að því meira saman, því meira gaman.

Til hamingju SAMAN - hópur

SAMAN hópurinn fær Íslensku lýðheilsuverðlaunin

Borgarvæðing brunarústa

Ég hef mikið verið að hugsa um það undanfarna daga afhverju borgarstjóri treystir ekki einkaaðilum til þess að byggja upp í miðbæ borgarinnar. Er það svo að markaðinum sé ekki treystandi?

Gamli góði Villi leggur ofuráherslu á að Reykjavíkurborg kaupi brunarústirnar til að tryggja uppbyggingu á sem skemmstum tíma. Ég verð að viðurkenna að mér hefur oft sýnst að einkaaðilar séu fljótari að byggja byggingar en borgaryfirvöld. En þá koma rökin um að tryggja götumyndina á horni Lækjargötu og Austurstrætis. Það ætti ekki er það vandamál fyrir borgina þar sem hún hefur skipulagsvaldið í sinni hendi.

Kannski er það bara eðlilegt að borgin kaupi lóðirnar á nokkur hundruð milljónir og byggi þarna hús í nær upprunalegri mynd. En ég get ekki verið viss því við í minnihluta borgarstjórnar höfum ekki verið höfð með í ráðum þegar rætt er um þessi viðskipti upp á hundruð milljóna króna. Við höfum ekki fengið nein gögn og svo virðist sem borgarstjóri vantreysti ekki bara einkageiranum, heldur líka minnihlutanum. Hann gleymir því að við búum við lýðræðisfyrirkomulag þar sem fjölskipað vald ræður ríkjum, þar sem fulltrúar allra borgarbúa eiga að koma að ákvörðunum er varða hag þeirra og borgarinnar.  

 

Forseti eftir 2 vikur

Ég vona svo sannarlega að frakkar taki áskorun Segolene Royal og hafni verðbréfahyggjunni en hampi manngildinu. Frakkar þurfa á auknum jöfnuði að halda og jafnari tækifærum til menntunar. 

Ég treysti Segolene af því að hún er kona og af því að hún er jafnaðarmaður !!!!

Royal hvetur andstæðinga peningahyggjunnar til að sameinast

Perlur mannlífsins

Mikið væri lífið fátækt ef ekki væru þeir sem eiga fáa sína líka. Ég hitti einn í dag í Fjölskyldu- og húsdýragarðinum þar sem Samfylkingin bauð upp á vorhátíð. Það var mikið fjölmenni og góð stemning enda vor í lofti bæði í veðri og pólitík. 

Rétt við innganginn hitti ég einstakan mann sem er ötull baráttumaður Samfylkingarinnar og fær oft ýmis hlutverk, stundum kallaður móttökustjórinn. Já hann er einstakur og gefur lífinu sjaldgæf litbrigði. Ég heilsaði að venju og spurði hvort ekki væri búið að fela honum eitthvað hlutverk í dag. 

"Jú, jú ég er að telja fólkið" 

Frábært segi ég. Mikilvægt að halda utan um fjöldann sem kemur í garðinn. Og hvað heldur þú að það séu margir sem hafa komið?

Minn maður hallar sér að mér og segir með sérstakri áherslu: "Alveg helling!!!"