Friður og FAAS

Góð helgi er á enda. Á föstudagskvöldið var ég gestakokkur í Friðarhúsinu og bauð upp á lifur með lauk og bláberjasósu, kartöflumús, salat og karrísteikt epli. Guðrún Bóasar kom með ljúffengt rótargrænmeti í hnetusósu. Um 70 manns komu í haustveisluna og var gerður góður rómur af matnum og ekki síður Svavari Knút sem spilaði og söng nokkur lög. Mér finnst þessir fjáröflunarkvöldverðir í Friðarhúsinu eitt að því skemmtilegra sem ég geri.  

Á laugardag var ég fundarstjóri á hátíðarfundi FAAS, Félags aðstandenda Alzheimerssjúklinga. Um 200 manns voru á fundinum þar sem boðið var upp á fjölmörg fræðandi erindi og ekki síður góða tónlist frá Kyrjunum og KK sem sló algerlega í gegn. 

Jonni, Jón Sigurðsson, varð sextugur í gær og fórum við í afmælisveislu mikla sem haldinn var í stúkunni í Laugardalsvelli. Eftir mat og skemmtun var dansað við undirleik hljómsveitar Sigga Jóns. Annað eins stuðband er varla til og ég finn það best nú á sunnudagskvöldi þegar lappirnar eru að drepa mig. 

Í kvöld fórum við fjölskyldan í mat til Ingu, Hectors og Evu Bjarkar. Þar var boðið upp dásamleg samskipti ásamt lambahrygg og ís og ávexti í eftirmat. Ég fékk að baða Evu Björk þannig að kvöldið var algerlega fullkomið.

Verkefni komandi viku eru allmörg. Á miðvikudagskvöld verður fundur Samfylkingarfélaginu í Reykjavík sem ber heitið "Þak yfir höfuðið - fyrir alla." Þar verð ég með erindi um stöðu mála í Reykjavík, Laufey Ólafsdóttir formaður Félags einstæðra foreldra mun halda erindi og Sigríður Ingibjörg Ingadóttir sérfræðingur í Félagsmálaráðuneytinu sem er starfsmaður Jóhönnunefndarinnar í húsnæðismálum. 

Athugasemdir

[Eva (IP-tala skráð) 23.9.2007 kl. 22:58]

Sæl vinkona,

kíki reglulega hingað inn, alltaf eitthvað áhugavert í gangi!

Mm, hvað máltíðin í Friðarhúsinu hljómar vel, þekki jú sjálf til þinnar eldamennsku. Vona að maður fari að rekast á þig, alltof langt síðan síðast!

Saga dafnar vel og það er spennandi að fylgjast með öllum þessum breytingum og nýjungum sem eiga sér stað hjá svona krílum:) Hafðu það gott! Eva

[María Anna P Kristjánsdóttir, 24.9.2007 kl. 08:29]

Við gátum því miður ekki verið á rástefnunni hjá FAAS,en hefur örugglega verið mjög lærdómsrík,sjáumst um næstu helgi.Kveðja María